എടിഎം ബാങ്കിംഗ് ഇടപാടുകൾക്ക് ചാർജ് വർധിപ്പിച്ചു
ന്യൂഡൽഹി: രാജ്യത്ത് എടിഎം ഇടപാടുകൾക്ക് ചാർജ് വർധിപ്പിച്ചു. കോൺഫെഡറേഷൻ ഓഫ് എടിഎം ഇൻഡസ്ട്രി ഇന്റർചേഞ്ച് ഫീ വർധിപ്പിക്കണമെന്ന് ആവശ്യപ്പെട്ടതോടെയാണ് ചാർജ് വർധനവ്. ആർബിഐയേയും നാഷണൽ പേയ്മെന്റസ് കോർപ്പറേഷൻ ഓഫ് ഇന്ത്യയേയും സമീപിച്ചതോടെയാണ് ചാർജ് വർധനവിന്‌ ഇടയാക്കിയത്.
കാർഡ് ഉപയോഗിച്ചുള്ള ഇടപാടുകൾക്ക് ബാങ്കുകൾ തമ്മിൽ ഈടാക്കുന്ന നിരക്കായ ഇന്റർചെയ്ഞ്ച് ഫീസ് 23 രൂപയാക്കിയാണ് വർധിപ്പിക്കുന്നത്. അക്കൗണ്ടുള്ള ബാങ്കിലെ ഡെബിറ്റ് കാർഡ് ഉപയോഗിച്ച് മറ്റൊരു ബാങ്കിന്റെ എടിഎം കൗണ്ടറിൽ നിന്നും പണം പിൻവലിച്ചാൽ ഈ എടിഎമ്മിന്റെ ഉടമസ്ഥരായ ബാങ്കിന് നിശ്ചിത തുക നൽകണം. ഇതാണ് ഇൻറർചെയ്ഞ്ച് ഫീസ്. ഇതിൽ വർധന വേണമെന്നതായിരുന്നു ആവശ്യം.
2021 ൽ 15 രൂപയിൽ നിന്നും 17 രൂപയാക്കി ഉയർത്തിയിരുന്നു. നിലവിൽ സൗജന്യ എ.ടി.എം ഇടപാടുകൾക്ക് ബാങ്കുകൾ പരിധി നിശ്ചയിച്ചിട്ടുണ്ട്. മെട്രോ നഗരങ്ങളിൽ അഞ്ച് എ.ടി.എം ഇടപാടുകൾ വരെ നടത്താം. മറ്റ് ബാങ്കുകളുടെ എടിഎമ്മുകളിൽ നിന്ന് പരമാവധി മൂന്ന് ഇടപാടുകൾ വരെ സൗജന്യമായി നടത്താം .